Hlýjar kveðjur!

Hér vil ég geyma allt það fallega sem kórsystur höfðu um mig að segja í kveðjuskyni vorið 2014.

Kveðjurnar sem ég fékk á vinatrénu!

• Dásemd og gaman að læra af
• Jákvæð
• Músíkölsk - Skemmtileg
• Hressileg
• Hress - Skemmtileg - Einstök
• Yndisleg - Fagleg
• Hugmyndarík með tónlistina í hjartanu
• Kæra Gróa - þú ert klárlega lang skemmtilegasti kórstjóri sem ég hef kynnst - Á eftir að sakna þín
• Fjölhæf
• Frábær kona - Atorkusöm - Skemmtileg - Kemur fram eins og þú ert klædd. Megi dagur hver fegurð þér færa
• Gróa alltaf jákvæð og hvetjandi
• Þú ert æði! Njóttu lífsins!
• Skemmtileg og frábær kórstjóri
• Díva - Fyndin - Skemmtileg - Húmoristi - Útgeislun - Frábær tónlistarkona
• Rosalega flink að spila á píanó og kirkjuorgelið
• Stórbrotin - arfahress - með músík ólgandi í blóðinu
• Brosmild
• Gleðigjafi
• Stórflott - kraftmikil og skemmtileg kona. Bjarta framtíð. Knús og kv.
• Hugrökk
• Hugmyndarík - Fjörug - Bráðskemmtileg
• Bestasti og krúttlegasti kórstjórinn minn. Sakni - sakni
• Dugleg
• Áræðin - Hæfileikarík - Dugleg - Kjörkuð - Sjálfstæð - Ákveðin
• Frábær kórstjóri - Skemmtileg og alltaf til í allt - Hláturmild - Gefandi
• Glaðleg - hress
• Æðisleg - Mögnuð - Snillingur - Litrík - Skemmtileg - Hress -Hugmyndarík - Frábær listamaður - Eftirminnileg - Gleðigjafi
• Spontant
• Listamaður - Prakkari - Stríðnispúki - Með góða nærveru
• Hugdjörf
• Bjartsýn
• Fjörug og músíkölsk
• Dugleg og hress
• Kraftmikil
• Elsku Gróa. Þú ert mjög skemmtileg og frábær kórstjóri. Þín verður sárt saknað! Kærleikskveðja, Sunna.
• Svona! Þið kunnið þetta alveg - burt með möppurnar!  Takk kæra Gróa, þú ert best
• Frábær og skemmtileg
• Frábær - Fjöhæf - Fersk
• Hugrökk
• Svo hress og frjálsleg
• Elsku Gróa! Ég þurfti bara eina æfingu til að ákveða hvort ég myndi ganga í kórinn. Ástæðan varst þú ! Þvílíkur kraftur, útgeislun og leiðtogi! Takk fyrir allt !!!  xxx
• Elsku Gróa. Takk fyrir allar skemmtilegu stundirnar. Það var gaman að   takast á við lagaval þitt fyrir tónleikana nú í vetur, gangi þér allt í haginn. 
• Gróa þú ert yndislegur gleðigjafi - þriðjudagskvöld eru æði
• Skemmtileg
• Takk
• Dásamlega hæfileikarík!
• Skemmtileg
• Snillingur
• Kraftmikil - Klár - Drífand - Dugleg - Skemmtileg - Áræðin - Ógleymanleg
• Frábær manneskja
• Yndisleg dúlla
• Þið getið þetta alveg stelpur!

Edik - best að eiga !

Borðedik oft kallað glært edik er lífrænt þ.e. þynnt ediksýra. Algjört töfraefni sem hægt er að nota til ýmissa verka.-

- Edik virkar vel sem klósetthreinsir – settu bolla af ediki að kvöldi til í klósettskálina og láttu ligga yfir nótt. Burstaðu svo vel og sturtaðu svo niður að morgni og klósettið verður skínandi hreint.

- Gott ráð er að þvo ull uppúr ediki. Ullarþvotturinn verður mýkri og fallegri.

- Edik er gott í baðvatnið þitt, það róar niður þreytta húð og virkar líka mýkjandi. Tilvalið að setja hálfan bolla út í baðvatnið. Ekki gleyma að bæta ilmolíu við vatnið til að losna við edik lyktina.  – Edik virkar líka mjög hreinsandi á baðkarið.

- Blandaðu saman vatni og ediki til helminga og settu í bursta til að þrífa saltrákir af skóm.

- Edik er mjög gott í skúringar, setjið einn tappa af ediki út í skúringavatnið og gólfið verður glansandi fínt.

- Blandaðu borðediki við vatn og stjúktu innan úr skáp með vondri lykt,

- Blandið vatni og ediki,1 hluti edik ámóti 10 af vatni í blómaúðabrúsa og úðið á gler og spegla. Þurrkið vel og strjúkið yfir með gömlum krumpuðum dagblöðum. Prentsvertan eykur gljáa.

- Ef þvottur lætur lit er gott að leggja hann í bleyti í vatn með ediki , 4 msk af ediki í 5 l vatni. Látið liggja í ca ½ klst. Skolað og þvegið á venjubundin máta. Eins má setja dálítið af ediki í þvottavélina í stað þvottaefnis til að flík haldi betur lit sínum.

- Vond lykt í íbúðinni. Setjið borðedik í skál og látið standa á eða nálægt ofni.

- Ef vond lykt er af skurðarbrettum er gott að skrúbba þau upp úr ediki og skola vel.

- Kaffivélar má þvo með því að láta edik í stað vatns í vélina og láta hana ganga. Endurtekið tvisvar með vatni til að eyða edikslyktinni.

- Ef vond lykt er úr ískápnum er gott ráð að þvo hann upp úr ediksvatni og skola vel á eftir. Einnig er gott að setja smá edik í skál og inní ískáp það minnkar ísskápalyktina.

- Þegar eldaður er lyktsterkur matur eins og t.d. skata er gott að vinda viskustykki uppúr ediki og leggja yfir pottlokið og vel út fyrir brúnir þess. Gæta samt vel að það snerti ekki eldavélahelluna.

- Kattahlandslykt hverfur ef úðað er á blettinn ediksblönduðu vatn (1 hluti á móti 5).

- Þrif á flísum og sturtuklefum.  Góð aðferð við þrif á fúgum milli flísa er að nota blöndu af ediki, lyftidufti eða matarsóda og sítrónusafa. Borið á og látið standa jafnvel í nokkra klukkutíma, skolað vel og þurrkað á eftir.

- Edik er fitulosandi, dregur úr matarlist og slær á gigt. Tvær matskeiðar af ediki út í glas af vatni. Drekkið nokkur glös á dag.

- Edik er gott við hálsbólgu. Teskeið af borðediki út í vatnsglas, nokkrum sinnum á dag.

- Edik er fínasta hárnæring og gefur hárinu fallegan gljáa. Berið í hárið og látið standa í 10 mínútur og skolið svo vel úr.

- Edik vinnur á flösu og leiðréttir sýrustig hársins. Nuddið hársvörðinn á hverjum degi upp úr ediki, árangurinn kemur í ljós á örfáum dögum.

- Edik er sérlega gott út í skolvatnið þegar nælonsokkabuxur eru þvegnar, þannig endast þær lengur.

- Edik er mjög gott út í skolvatnið þegar ný handklæði eru þvegin. Ló losnar og handklæðin verða síður vatnsfráhrindandi.

- Edik er gott við svitalykt í fötum. Nuddið flíkina upp úr edikblöndu (edik og vatn til helminga) og látið bíða í ca. 15 mínútur áður en fatnaðurinn er settur í þvottavélina.

- Edik er gott til að ná klór- og lauklykt af fingrum. Nuddið fingurna og bíðið í stutta stund.

- Edik er mjög gott til að ná vondri lykt úr híbýlum. Sjóðið edik og vatn saman eða látið malla í dágóða stund á hellunni.  Vonda lyktin fer og edik lyktin eyðist mjög fljótlega.

- Edik er tilvalið hreinsiefni til að ná fitu og mjög gott til þess að þrífa fiskabúr.

- Eplaedik og vatn til helminga er frískandi andlitsúði.

- Edik slær á kláða, sé það borið á húðina. Þá sérstaklega eplaedik.

- Edik er gott við kælingu á sólbruna sem og á flugnabit.

- Edik er tilvalið til að mýkja upp harða málningarpensla. Sjóðið penslana upp úr vatni og ediki og þeir verða eins og nýir.

- Edik er tilvalið til að losna við grunna ryðbletti, t.d. á reiðhjólum,  nuddið þá með ediki og álpappír.

Tími kominn til að endurvekja þetta blogg.

Það er ekki normal að maður skuli láta undir hæl leggjast að blogga.  En þetta er allt Facebook að kenna .... sá tímaþjófur !!!  Það er nú samt þægilegt að fylgjast með sínum þar, hvort sem það eru skyldmennin eða vinirnir ... tja eða þeirra vinir og þeirra vinir.

En nú fannst mér tilefni til að blogga!

Í vetur var ég beðin um að skrifa stutta grein um það hvernig árið 2014 leggðist í mig. Þetta var til birtingar í blaði suður með sjó sem kallast Reykjanes. Þetta gerði ég auðvitað, eins og ég kunni að segja nei????  Ég hafði ekkert séð blaðið sem kom út 9. janúar, en fletti því upp á netinu.  Þarna eru nokkrir einstaklingar spurðir sömu spurningar og ég og hvað haldiði að hafi stungið mig við lesturinn?

Það eru allir á jákvæðu nótunum .... nema ÉG.  Hvort fólk sem býr fyrir sunnan er blint eða bara svona hrikalega jákvætt veit ég ekki, en ég tel mig sæmilega raunsæja og finnst ekkert bjart framundan.

Hérna eru fyrirsagnir og fyrsta setning hjá hinum sem beðnir voru um skrif:

• Viljinn, við og venjurnar … Nýtt, spennandi ár framundan, óskrifað blað.

• Spennandi tímar hjá HS Veitum … Í meginatriðum leggst árið vel í mig.

• Tækifærin allt í kringum okkur …. Árið 2014 er spennandi og leggst vel í mig.

• Áfram jákvæðni á árinu 2014 … Þegar klukkan læðist nær miðnætti og nýtt ár er alveg að ganga í garð, lætur maður huga reika til baka.

• Bjartar horfur á nýbyrjuðu ári …. Ég lít á nýbyrjað ár með tilhlökkun og er sannfærður um að erfiðleikar sem fylgdu bankahruninu séu að baki og að framundan séu bjartari tímar.

• Bara birta framundan … Árið 2014 leggst einstaklega vel í mig.

• Við hjá SAR lítum þokkalega björtum augum á árið 2014 …. Það er að losna um verkefni sem hafa verið í bið og með útspili ríkisstjórnarinnar sem virðist ríkja þokkaleg sátt um, þá ættu hjólin að fara að snúast hraðar.

• Möguleikarnir er miklir … Í upphafi árs er mér ofarlega í minni vinna föður míns síðustu árin við að skrástetja heimildir um ættfeður mína sem flestir voru sjósóknarar í marga ættliði, ættaðir af Suðurnesjunum.

• Bjartsýn … Það er ekki hægt að ræða um nýja árið án þess að staldra aðeins við það sem á undan er gengið árið 2013.

• Við höfum verk að vinna …. Árið 2014 leggst mjög vel í mig, ég er bjartsýn

• Stendur best allra sveitarfélaga … Árið 2014 leggst bara ljómandi vel í mig.

Svo er hérna mitt svar:

Litla barnið mitt ....

Þessi dúlla verður 13 ára á mánudaginn 2. nóv.

Í því tilefni bjóðum við ættingum í súpu á sunnudaginn kl 18.00.

Og svo er víst ágætt að fara að baka eins og eina köku til að hafa í eftirrétt.

Kveðja frá Hellu :)

Verð búandi á Hellu í vetur.

Við Harpa Sól og Gylfi Björgvin munum búa í húsinu hans Hreins Gunnars, en hann fór til Danmerkur til að vinna við járningar á íslenskum hestum í landi Margrétar Þórhildar (held samt að hún sjálf eigi ekki íslenska hesta....)

Sæti hundurinn okkar, hann Bassi, býr auðvitað líka hjá okkur. Hann er ættaður frá Mánárbakka á Tjörnesi og er algjör gullmoli.

Ég fékk stöðu organista í Hveragerðis- og Kotstrandarkirkjum :) og æfi svo líka kór borgarstarfsmanna og af og til líka Brokkkórinn.

Svo stendur til að búa til unglingakór við Hveragerðiskirkju .... vonandi gengur það vel :)

Stóru strákarnir eru nátt'lega að gera frábæra hluti í tónlistinni - eins og alþjóð veit og mömmuhjartað er stolt og glatt fyrir þeirra hönd.

Flutt suður !

Já, þá höfum við yfirgefið norðurlandið og flutt suður aftur. Ég er í Reykjavík, Gylfi Björgvin á Hellu hjá Hreini Gunnari og Harpa Sól með pabba sínum. Þau hafa nú verið austur á Hellu, en fara til Keflavíkur í dag. Pabbinn á að mæta á kóræfingu í kvöld fyrir útför á föstudag. Ætli þau fari svo ekki aftur í sveitina ?

Ég hef nóg að gera á Flókagötunni! T.d. voru öll fötin hans Guðmundar Óskars óhrein !!! Hann og Siggi hafa verið svo uppteknir af tónleikaferðum, tónleikum og upptökum í hljóðveri, að þeir hafa ekkert sinnt "bústörfum" í langan tíma.

Núna er þvottavélin á þriðja skammti og enn eru eftir 6 býst ég við.

Svo þarf ég að koma skikki á allt mitt blaða og bókaflóð og fara að finna til hitt og þetta spennandi fyrir kóra. Er að gera áætlanir um útgáfu á einhverju nýju efni fyrir kóra - a.m.k. barnakóra. Hugmyndin er svo að hafa efnið aðgengilegt á netinu. Í dag er ekki mögulegt að láta prenta kórbækur, því þær seljast ekki nægilega vel. Kórstjórar eru enn að kaupa eitt eintak - eða fá eintök - og ljósrita fyrir kórfélaga.

Jæja, ég held ég haldi nú áfram .... eða kíki aðeins út í sólina.

Hafið það gott !

Páskafrí

Hvernig nýti ég páskafríið?

Dagur 1: Þvoði hauga af fötum, handklæðum og rúmfötum.
Dagur 2: Þvoði meira, vann í heimasíðunum, skipulagði tímana marimbanámskeiðinu.
Dagur 3: Keyra til Akureyrar svo börnin geti farið í Fjallið, fór á fund með Ástu og Adrien að klára skipulagninguna á marimbanámskeiðinu. Æfing með "Garðari Hólm" um kvöldið sat svo langt fram á nótt við að reikna út skiptingu kostnaðar við rekstur tónlistarskólans á sveitarfélögin sem koma að honum.
Dagur 4: Held áfram að vinna við heimasíðurnar, svara pósti og kíki á facebook. Baka köku fyrir fjáröflunar-kökubasar hjá fimleikadeildinni á Húsavík. Pakka niður með börnunum sem fara suður á morgun. Svo er kirkjukórsæfing í kvöld.
Dagur 5: Keyri börnin til Akureyrar í flug. Sendi kökuna til Húsavíkur. Vinn áfram í heimasíðunum. Fer í matarboð með strákunum í "Garðari Hólm". Þar verður sennilega sungið!

Meira seinna.

Jú, ég er lifandi !!!

Þótt litlu hafi mátt muna að ég snjóaði í kaf hér um daginn, þá er dagurinn í dag með allra fegurstu vetrardögum .... og það sést nánast til vorsins. Glampandi sól á hjarnaða jörðina, ljósblár himinn og flugur að vakna til lífsins.

Hér hefur allt gengið nánast sinn vanagang frá áramótum. Þorrablót voru haldin með pompi og pragt og öllum þeim venjum og siðum sem tíðkast.



Vorfagnaður karlakórsins Hreims (sem eru þeirra aðal-tónleikar í heimabyggð) var haldinn s.l. laugardag. Diddú kom og söng með kórnum, sem og kvartettinn Út í vorið. Tónleikarnir voru alveg ágætir en tónleikagestir hefðu mátt vera fleiri. Bæði gerði að veðurspáin var ekki hagstæð og kannski eiga ekki allir aflögu aur til að koma á tónleika, en svo dettur manni í hug að "unga fólkið" hafi ekki brennandi áhuga á svona "venjulegum" karlakórssöng, jafnvel þótt Diddú hafi verið til skrauts.



Ég held að áhugamannakórar ættu að hugsa aðeins meira út í lagaval sitt og vera með meiri fjölbreytni. Og þá er ég ekki að meina fjölbreytt lagaval á einum tónleikum, heldur vera með mismunandi tónleika. Gera eina tónleika með einhverju sérstöku efni og aðra tónleika með "hefðbundnu" efni. Hvað haldið þið?

Svo brast á páskafrí !!! Ég þarf nú samt að hafa eina kóræfingu eða tvær fyrir messur um páskana. Mér finnst spennandi að fá að upplifa páskavöku um miðnættið á laugardaginn kemur. Þá er messað kl 23.30 í Grenjaðarstað og vakað lengi frameftir.
Svo er messað á páskadag þar og á annan í páskum í Nesi.

Strax á þriðjudag eftir páska verður marimbanámskeið fyrir krakkana úr skólanum hér, á Húsavík og úr Giljaskóla á Akureyri. Námskeiðið verður í Glerárkirkju í þrjá daga og koma tveir kennarar frá Svíþjóð og tveir úr Reykjavík, auk okkar hér fyrir norðan.

Jæja, ætli þetta sé nú ekki nóg í dag? Reyni að segja meiri fréttir fljótlega.
Hafið það sem allra best.

Gleðilegt nýtt ár ...... fullt af hamingju !!!

Sumarið búið !

Meira að segja hér í dásemdarríkinu er orðið haustlegt. Það var í fyrsta sinn s.l. miðvikudag að það var kalt að koma út að morgni. Fram að þessu hafa börnin ekki verið í utanyfirflíkum en núna kemur Harpa Sól inn eftir hálftíma og er rjóð í kinnum af kuldanum.


Enda góðu vön í sumar - bæði hér á landi og svo fórum við í frí til Flórída og Bahama. Þar var aldeilis hlýtt og gott :)










Við heimsóttum Disney garðana í Orlando og Universal Studeos, gistum á flottum íbúðarhótelum.





Það er margt skemmtilegt hægt að gera í skemmtigörðunum, krökkunum þótti skemmtilegast að fara í rússíbana og "skvettubáta" en í þeim varð maður hundblautur !!!




Ströndin á Bahama er alveg frábær - stórar öldur og æðislegt fjör í sjónum.





Skipið sem við fórum með, var nú ekki stórt eða flott ..... en til Bahama fórum við og nutum þess.

Kóramót í Eistlandi !

Þriðjudaginn 5. ágúst hófst Nordic-Baltic kórfestival í Tartu í Eistlandi. Eini íslenski kórinn sem tók þátt var Kyrjukórinn úr Þorlákshöfn. Auk hans voru 2.300 kórsöngvarar frá Noregi, Svíþjóð, Danmörku og Finnlandi og svo frá Lettlandi, Litháen og Eistlandi. Nokkrir rosalega góðir kórar og kórstjórar voru þarna - þótt ég hafi nú ekki heyrt nema örfáa kóra.



Setningarathöfnin var á þriðjudagskvöld og hófst með lúðrablæstri, en síðan var tilkynnt að þeir söngvarar sem lengstan veg ferðuðust til að mæta væru frá Íslandi. Og með það gekk ég klædd íslenskum upplut uppá "runway" og gekk syngjandi Hani, krummi, hundur, svín ...... frammi fyrir fjölda fólks, upp á svið þar sem við íslendingar vorum boðin velkomin !!!
Það var reyndar bara ég og Garðar Cortes sem vorum komin, því kórinn var á leiðinni í rútu frá Tallin !!

Næstu tvo daga voru fyrirlestrar fyrir kórstjóra fyrir hádegi um kórtónlist og þróun hennar í nokkrum landanna. Einnig voru kynnt ný kórverk frá nokkrum þeirra m.a. kynnti Garðar verk eftir Hildigunni Rúnarsdóttur. Á sama tíma voru kórar að syngja tónleika í kirkjum og á sviðinu á ráðhústorginu.
Eftir hádegismat voru svo sameiginlegar kóræfingar á stóru útisvæði ætlað til kórsöngs: Song celebration ground !
Á kvöldin voru tónleikar í kirkjum og í tónleikahúsi borgarinnar: Vennemuje !



Á föstudeginum var kórum ekið hingað og þangað, þremur til fjórum á sama staðinn. Þar fengu þátttakendur leiðsögn um staðina, hádegismat og síðan voru tónleikar kl 5. Okkar kór fór ásamt tveimur norskum og einum frá Lettlandi í bæ sem heitir Elva og áttum við mjög ánægjulegan dag. Tónleikarnir gengu alveg ágætlega í lítilli kirkju - án hljóðfæris en með mikilli fúkkalykt!!



Samæfing var fyrir hádegi á laugardeginum og um miðjan dag var safnast saman á ráðhústorginu í risa-langa skrúðgöngu. Lokatónleikarnir fóru svo fram á söng-svæðinu og gekk allt mikið vel. Sunginn var mótssöngur frá Eistlandi, síðan tvö lög frá öllum þátttökulöndunum og í restina lögin fjögur sem voru mótslög á árum áður, en þetta var í fimmta sinn sem svona mót er haldið. Í lok tónleikanna var tilkynnt að næsta mót, árið 2010 verði haldið á ÍSLANDI !!! og tók Garðar Cortes formlega við fána þessara kóramóta til að hafa með til Íslands.



Okkar hópur átti svo bæði sunnudag og mánudag fyrir sig í Tartu en flugið heim var á þriðjudeginum kl 18.10 frá Tallin.
Ég fór á undan hópnum til Tallin til þess að fá smá tíma til að skoða gamla miðbæinn þar. Hann er alveg hreint yndislegur og var ég glöð að hafa drifið mig ..... þótt fæturnir á mér, allir sundurstungnir af flugum, væru sannarlega sárir og aumir.
Þegar ég fór til læknis eftir heimkomuna var ekki við annað komandi en ég yrði sett á steralyf til að láta þetta lagast. Og annað: þar sem ég er að fara til USA á miðvikudaginn í frí með börnin, þá verð ég sannarlega að halda áfram að dæla í mig sterum og ofnæmislyfjum til að fara ekki svona illa aftur.

Nýjar fréttir

Tíminn flýgur !!!

Og þið hafið ekki fengið nýjar fréttir í laaaaaaangan tíma ...... ussss skömm að þessu !!!

Núna er ég stödd í höfuðborginni. Er að fara að spila með 5 söngnemendum í stigsprófum á morgun og æfði með þeim fimmtudag, föstudag og laugardag.
Svo ætla ég í Þorlákshöfn annað kvöld að hitta Kyrjukórinn, en við förum 5. ágúst til Eistlands á Nordic-Baltic kóramót.

Þann 15. júní flugum við mæðgur, ásamt 30 öðrum úr Aðaldal til Köben. Þaðan fórum við með lest til Varberg í Svíþjóð á þriggja daga námskeið í afríkanskri tónlist. Spiluðum á marimbur, Mbirur, Jembe-trommur, sungum og dönsuðum !!!! Gistum í fangelsi úti á tanga við sjóinn !! (myndir koma seinna).
Síðan var aftur farið til Köben og gist í tvær nætur, farið í Dýragarðinn, Strikið gengið og svo í Tívolí fram á kvöld.
Ferðin gekk vel og allir komu glaðir og ánægðir heim. . . . OG - við fáum einn af kennurunum frá námskeiðinu til okkar norður í lok júlí. Ég veit að krakkana hlakkar rosalega mikið til að hitta hann aftur - hann var svo skemmtilegur :)

Þegar ég fór að heiman skildi ég SYNGIBJÖRGU og hennar fylgifiska eftir í húsinu. Þau voru í sumarfríi - en veðrið lék aldeilis ekki við þau og flúðu þau fljótlega til Reykjavíkur. Skömm að þessu kæru veðurguðir :(

Vona að þið hafið öll keypt nýju plötuna hans SIGGA ...... "Oft spurði ég mömmu"
Ef þið hafið ekki gert það ennþá, drífið ykkur þá út í búð og kaupið "Sleepdrunk season" með Hjaltalín í leiðinni. Slakið svo á í sumarfríinu og hlustið endalaust á frábæru strákana mína ..... hahahah.

Hafið það best af öllum.
Og munið eftir sólarvörninni :)

Tónlistarverðlaunin.

Jæja, þá hafa tónlistarverðlaunin verið veitt fyrir árið 2007.

Guðmundur Óskar og vinir hans í Hjaltalín voru með flestar tilnefningarnar - en hlutu tvenn verðlaun. Högni sem söngvari ársins og hljómsveitin sem bjartasta vonin.

Siggi fékk verðlaunin fyrir Megasarplötuna - en hún var besta plata í flokki popptónlistar.

Hátíðin var mjög fín og gaman að Páll Óskar "átti kvöldið". Rúnar Júlíusson fékk heiðursverðlaunin - gaman að því.

Nú - þótt ég sé í Reykjavík í "páskafríi" - þá er samt nóg að gera. Ég spila messu á RUV í fyrramálið og síðan tvær messur á páskadag. Já, og svo fermist Gylfi Björgvin á annan. Það verður vonandi bara gaman, þótt ég sé nú lítið byrjuð að undirbúa veislu. Ætli ég hristi hana ekki fram úr erminni svona eins og mér er einni lagið ?? haha.

Meira seinna.

Gleðilega páska !!!

Fréttir úr Aðaldalnum.

Já ég hef fengið skammir fyrir blogg-leti, en það er ekki alveg mér að kenna.
Landsbyggðin fær oft ekki eins góða þjónustu eins og höfuðborgarsvæðið og fleiri þéttbýlisstaðir t.d. hvað varðar netaðgang.
Netið hefur verið með eindæmum slæmt hérna og sem dæmi ætlaði tölvan að vera 9 klukkutíma að hlaða niður msn forritinu í nýju tölvuna hjá mér. Þá sagði ég nei takk !!!!

Ég er mjög óvinsæl hjá Hive, því ég hringi nokkrum sinnum í viku til að kvarta undan seinagangi eða bara engu sambandi.
Krakkaræflarnir sem svara í símann geta auðvitað ekkert að þessu gert en reyna að láta mig ekki fara í pirrurnar á sér - það gengur mis-vel en oftast eru þau nú sæmilega þolinmóð að svara athugasemdum.

Þetta á auðvitað ekki að vera svona. Við úti á landi borgum fyrir fulla þjónustu, fullan aðgang að netinu - en verðum svo að hanga fyrir framan skjáinn og bíííííííííða. Það er illa farið með dýrmætan tíma manns !!!

Hér er annars allt í fínu :) Já, og kannski rúmlega það! Við skruppum til Akureyrar á föstudaginn eftir skóla til að kaupa svarta skó á Gylfa fyrir þorrablótið. Keyptum líka fermingarfötin í leiðinni !!!!! Og Harpa fékk leggings. Ég ætlaði að kaupa mér sundgleraugu --- en keypti í staðinn BÍL !!!!!!

Ég setti Mussóinn uppí glæsikerru af tegundinni VOLVO Cross country - þvílíkur draumabíll. Bara rétt eins og að sitja í Lazy-Boy sófa eða svona svipað og var með Chryslerinn minn.

Og nú eru allir sáttir og glaðir.

Það hefur verið töluvert að gera, því um síðustu helgi var haldið þorrablót skólans. Og þvílík hátíð !!!!! Eldhús skólans sá um matinn, nemendur sáu um skemmtiatriðin, kennarar sáu um gæslu og uppvask og svo var hljómsveit sem spilaði fyrir dansi fram yfir miðnætti. OG hér dansa allir "í haldi" ..... nemendur nýta sér danskennsluna sem þau fá í viku á hverju ári og sýndu frábæra takta. Auk þess dansa foreldrar við börn sín á öllum aldri og allir skemmta sér vel.

Skemmtiatriðin voru:

Lúðrasveitin spilaði þrjú lög.
Litli kórinn söng fimm lög.
Þrír nemendur á harmónikkur spiluðu saman eitt lag.
Nemendur miðstigs fluttu leikrit eftir handriti eins kennara skólans.
Nemendur 8.bekkjar fluttu leikþátt bæði á sviði og einni af videói sem þau voru búin að taka upp, klippa og setja tónlist inná.
Formaður nemendafélagsins hélt ræðu.
Einn nemandi söng einsöng, en hún vann söngkeppni á Laugum helgina áður.
Eldri kórinn söng 4 gospellög.

Kynnar kvöldsins voru tvær stúlkur úr 10. bekk.

Harpa Sól lék í leikriti miðstigs og söng í eldri kórnum og Gylfi Björgvin lék í 8.bekkjar leikritinu.

Daginn eftir, laugardaginn 23. febrúar var kóramót á Húsavík í tilefni af Degi tónlistarskólanna og að Samkór Húsavíkur hafði keypt og gefið kórpalla. Karlakórinn Hreimur tók þátt í þessu og söng bæði sér og í sameiginlegum lögum allra kóranna.
Ég spilaði líka með unglingakórnum sem Hófí stjórnar.
Í söngskrá var getið allra kóra og stjórnenda - en mitt nafn var það eina sem hvergi kom fram. Þegar gerð eru prógröm á prenti þarf fólk að vanda sig að allt komi fram, því þetta eru sögulegar heimildir.

Sunnudaginn 24.02 spilaði ég svo fyrstu eiginlegu messuna og var hún í Nesi. Það gekk ágætlega, þótt harmóníumið þarfnist nú orðið yfirhalningar.

Í dag var svo vetrarfrí í skólanum og tókum við því lífinu létt í dag og dúlluðum okkur bara heima, þar til í kvöld að ég varð að fara á karlakórsæfingu. Jú, Gylfi skrapp í Torfunes með hnakkinn sinn og fór í tvo reiðtúra og Harpa fór í fimleika á Húsavík.

Ég set inn myndir seinna.
Hafið það gott elskurnar.

Flutt í sveitina.

Sunnudaginn 6. janúar 2008 lagði ég af stað með troðfullan jeppa af töskum og dóti og tveimur börnum.
Ferðinni heitið norður í Aðaldal í einni lotu. Veðurspáin gerði ráð fyrir alauðu og hlýindum.
Það stóðst nú ekki alveg og voru kaflar á leiðinni ansi leiðinlegir - bæði snjókoma og hálka. En um leið og ég beygði út Kinn var orðið mar-autt og hefur ekkert snjóað hérna.
Okkur líst voða vel á þessi nýju heimkynni og þótt við búum fyrstu dagana bara á gömlu heimavistinni, þá líður okkur vel.

Ég er búin að hitta næstum alla nemendur sem ég á að kenna í vetur, gera stundaskrá sem sennilega heldur lögun og skoða króka og kima í skólanum. Hér eru allir elskulegir og taka mjög vel á móti börnunum mínum, sem eflaust hefur kviðið smá fyrir þessum breytingum.

Í gær tókum við Gylfi rúnt og fórum í Torfunes, þar sem hann fær að vera með hestinn sinn þegar líður. Svo skruppum við til Húsavíkur að versla smá inn. Í gærkvöldi fórum við svo út í Ídali til að hitta Karlakórinn Hreim, en ég verð að spila með þeim í vetur.

Í dag eftir skóla keyrðum við til Akureyrar - skruppum í nokkrar búðir - keyrðum upp í Hlíðafjall - og fengum okkur að borða.
Þegar við komum aftur í Hafralæk fórum við í sund í okkar einkasundlaug !!! Þetta er bara snilld !!!

Hafið það gott þangað til næst.

Gleðilegt nýtt ár !

Ef einhver þarna úti rekur inn nefið á þetta blogg, vil ég

segja við hann: Megi nýtt ár færa þér góða heilsu,

hamingju og velfarnað.

Ég hlakka til þeirra verkefna sem bíða mín á nýja árinu,

á nýja staðnum, í nýja skólanum og nýju kirkjunum.

Það er að segja: þetta verður allt nýtt fyrir mér :)

Kveðja.

Jolaannir tonlistarmannsins....

..... gera það að verkum að ég hef ekki verið í neinu formi til að blogga og hef nú fengið smá skammir fyrir dugleysið !!!
En takið gleði ykkar ..... hér eru nýjustu fréttir af mér og mínum.

Ef ég ætti að skrifa ALLT ..... þá sæti ég hér í alla nótt og svæfi yfir mig í fyrramálið, en ég þarf að spila við messu í Grafarholti kl 11 og vera með barnakórinn þar (vona bara að ÞAU mæti). Það er annars leiðinlegt hvað mætingar eru stundum ekki nógu góðar í barnakórum.....ja og kórum bara yfirleitt. Mín skoðun er sú, að taki maður eitthvað að sér - þá stendur maður sig !!!!!

Foreldrar leyfa börnum sínum stundum að vera í of mörgu og þá er ekki nokkur leið að púsla öllu saman á annatímum !
En ekki meira kvart og kvein !!




Þann 6. desember komu næstum allir kórar sem ég hef unnið með í vetur, fram á tónleikum í Grafarvogskirkju. Þetta voru einskonar kveðjutónleikar þótt ég komi nú til með að hitta einhverja kóra af og til fram á vor. En kórarnir sem voru þarna eru:
Brokkkórinn, Söngraddir Reykjavíkur, Kyrkjukórinn, Krakkakór Grafarvogskirkju, Barnakór Grafarholtssafnaðar, Barnakór Landakotsskóla, Unglingadeild Domus Vox og Sönghópur Ingveldar Ýrar. Sá kór sem ekki gat tekið þátt, en söng undir minni stjórn á tónleikum í Háteigskirkju 15. desember var Kór söngnemenda Domus Vox.

Jæja, nóg af mér í bili. Nú eru það fréttir af börnunum.
Þriðja Hjálmaplatan kom út fyrir nokkrum vikum og hefur selst í um 7000 eintökum, svo hún er búin að fá gullplötu !!!
Siggi spilaði líka með Senuþjófunum inn á báðar nýjustu plötur Megasar og auk þessa er hann að spila með Baggalúti og eitt og annað skemmtilegt sem til fellur.

Fyrsta plata Hjaltalín kom út fyrir nokkrum dögum og hefur fengið rosalega góða dóma allsstaðar. Þeir eru að spila og árita plötuna hingað og þangað krakkarnir og gera stormandi lukku. Guðmundur Óskar er mikið í fjölmiðlum sem talsmaður þessa skemmtilega hóps. Auk þess að spila - bæði í Hjaltalín og Svitabandinu - þá vinnur hann í versluninni Elvis !!!

Hreinn Gunnar er alltaf í sveitinni, að eiga við hesta. Hann þykir efnilegur járningamaður og gengur allt í haginn. Hann dvelur alveg í Austur-Landeyjum á bænum Skíðbakka og unir sér hið besta.

Af yngstu börnunum er allt gott - en ekki kannski neinar stórfréttir. Harpa Sól syngur í Stúlknakór Reykjavíkur og tók þátt í nokkrum tónleikum með þeim - en missti af því að syngja í Kastljósinu um daginn, því móðirin er svo upptekin að hún gleymdi að barnið átti að fara í sjónvarpið.

Ég bætti henni það upp með að taka hana með á jólaball Stundarinnar Okkar, en þar var krakkakórinn að syngja við undirleik hljómsveitarinnar Ljótu hálfvitarnir, sem eru Þingeyingar - eins og ég verð eftir áramótin !!!! hahahahahahah !!!!!

Það er mikill höfuðverkur á þessum tíma að vera líka að flytja út á land ...... eða bara flytja yfirleitt ! Ég er að reyna að gera mér grein fyrir því hvað ég tek með mér og hvað ég skil eftir í bænum um leið og ég laga til fyrir jólin. Þar af leiðandi er ég lengur að hlutunum og hef aldrei verið svona sein með jólaundirbúninginn.

Ég óska ykkur öllum gleðilegra jóla.

Sumt er natturlega otrulegt !!

Kíkið á þetta:

http://video.tagged.com/?v=2MywIYNbd

TILBREYTING !!

Ætli nú sé ekki ástæða til að blogga.
Mín búin að ráða sig í stöðu skólastjóra frá 1. jan. í Hafralækjarskóla.
Sveitasælan ætti nú aldeilis að gera mér gott, haldiði það ekki.
Ætli ég fái ekki gamla háralitinn aftur, sléttari húð og ja, allavega yngist ég upp - hef trú á því.

En án gríns ! Ég ætla að búa í Aðaldalnum frá áramótum í eitt og hálft ár.
Tek yngstu börnin tvö með mér og nýt þess að kynnast þeim betur.
Ég fór norður fyrir skemmstu og leist vel á staðinn og skólann.

Skrifa meira seinna - er bara í gati :)

Hafið það gott.

Menningarnottin

Þvílíkt dýrðarveður alltaf á menningarnótt.



Sönghópur Ingveldar Ýrar söng fyrir utan Söngskólann í Reykjavík eins og margir aðrir kórar.
En hélt líka tónleika í Fríkirkjunni. Þeir voru mjög fínir og afar vel sóttir. Á því miður ekki mynd :(



Siggi minn var að spila með Megasi á Klambratúninu um kvöldið. Og þeir voru mjög flottir.




Ein mynd af Gylfa Björgvini sem er að verða 13 ára eftir nokkra daga og á að fermast í vor.



Nennti ekki að labba niður að sjó til að sjá flugeldasýninguna heldur stóð hér úti á blettinum mínum og sá rétt í toppinn á stærstu flugeldunum.
Magnað hvað getur dottið í mann einhver leti - og einmannakennd á svona dögum.
Ég er pínu tóm eftir túrinn til Berlínar og alla upplifunina þar.

Syngibjörg var í bænum, en við eitthvað öðruvísi stemmdar en í fyrra og eitthvað annað að hugsa.
Hún flaug til Köben í skólann sinn í morgun. Vona að allt gangi vel hjá henni.

Meira seinna.